گجيل وئبلاگيندان



ائحسان اولسون

گؤيلومو ايسته سه هر كيمسه هراسان اولسون
او دا من تك گؤروم آخيرده پريشان اولسون

مين گؤيول حسرت-ى نانيله پريشان اولسا
قويمارام ديلبريمين زولفو پريشان اولسون

هر كيم ايستير وطنيندن قاچا ديوانه كيمين
تا اؤلونجه قالا غوربتده، موسلمان اولسون

مؤ´مين-ى كاميل ايديم بنده فراوانليقدا
كافير اولدوم، بو گره ك كي باهاليقدان اولسون

بوش يئره خلقه پيلوو وئرمه، منيم حاققيمي وئر
شولوذيممه دده ن ارواحينا ائحسان اولسون

گؤروره م شووقه گليبسن٬ دالين ايستير حجمت
واقتي واردير، هله قوي ماه-ى حزيران اولسون

گئده!، من زور ايله خالقين يولونو كسمه ميشم
بوردا گئچمير عملي، عازيم-ى تئهران اولسون

منه لازيمدي اوباشدانه پيلوو، شامه كباب
سن ده سعي ائيله قازان، سوفره ده شوربان اولسون

گرچه اون دانه يليم واردي ماهوت تره زري
حاجي سئومير٬ دئيير از مخمل-ى كاشان اولسون

مووعيدي گئچميش بولارين٬ ايسته ميره م ائي خيياط
منه بير يل تيكه سن٬ اينيمه چسبان اولسون

لاكين آمما سنه بير يل تيكه رم تئهراني
حاجي خوشلانسا گره ك موزدو فراوان اولسون

بئله شئيلرده حاجي، كان-ى سخاوتدي باجي
وئره جك ايسته دييين٬ هر نئچه تومان اولسون

فقط آمما كاسيبا بير قره تنبل وئرمز
گرچى باشدان آياغا پئيكري عوريان اولسون

يوخسول همسايه سىنين حاليني گؤرمور موطلق
بئله دؤولتلي گره ك قانينا غلطان اولسون

مؤعجيز´ين اولماسا ايفطاره كبابي٬ آشي
قورخورام خاچ ساليب بوينونا، آلمان اولسون

شبيسترلي معجز